• 06 Jan, 2025
• admin
• No comment

امریکا برفانی طوفان کی لپیٹ میں، سات ریاستوں میں ایمرجنسی نافذ

امریکا برفانی طوفان کی لپیٹ میں، سات ریاستوں میں ایمرجنسی نافذ، امریکا میں شدید برفانی طوفان سے تقریباً 6 کروڑ افراد متاثر، کئی صوبوں میں ایمرجنسی نافذ کردی گئی۔ کینٹکی، ورجینیا، ویسٹ ورجینیا، کنساس، آرکنساس، نیو جرسی اور میسوری سمیت کئی ریاستوں نے ایمرجنسی کا اعلان کر دیا ہے۔

برف جمع ہونے کی وجہ سے ان ریاستوں کی تقریباً تمام شاہراہیں بند کر دی گئی ہیں۔ انتظامیہ نے سڑک استعمال نہ کرنے کی وارننگ دی ہے۔ ہزاروں پروازیں منسوخ کرنا پڑی ہیں اور اسکول بند کردیئے گئے ہیں۔

طوفان کے باعث امریکہ میں نظام زندگی بری طرح متاثر ہوا ہے۔ سینکڑوں پروازیں متاثر ہوئی ہیں، سڑکیں بند ہیں۔
شدید برف باری اور کم سے کم درجہ حرارت کا گزشتہ ایک دہائی کا ریکارڈ ٹوٹ گیا۔

کنساس اور میسوری اس وقت سب سے زیادہ متاثر ہیں۔ کچھ علاقوں میں اتوار کی دوپہر سے 10 انچ تک برف باری ہوئی ہے۔ کنساس کے اہلکار برائن پلاٹ نے کہا، “پچھلے 32 سالوں میں میں نے 10 انچ سے زیادہ برف باری نہیں دیکھی۔

محکمہ موسمیات کے مطابق ملک کے وسط سے مشرقی ساحل تک تقریباً 30 امریکی ریاستوں میں صورتحال سنگین ہونے کا خدشہ ہے۔

ماہرین موسمیات کا کہنا ہے کہ خراب موسم کی وجہ قطبی بھنور (آرکٹک کے گرد ٹھنڈی ہواؤں کا بہاؤ) ہے جس میں واشنگٹن ڈی سی اور فلاڈیلفیا سمیت کئی بڑے شہروں میں شدید برف باری کا خدشہ ہے۔ محکمہ موسمیات نے کہا ہے کہ پیر سے خراب موسم سے ریلیف متوقع ہے۔