• 21 Jul, 2023
• admin
• No comment

دونوں شہروں میں بارشوں کا سلسلہ جاری

حیدرآباد، بیورو رپورٹ: تلنگانہ کے بیشتر اضلاع اور دونوں شہروں حیدرآباد اور سکندرآباد میں مسلسل بارش نے شہر کے کئی علاقوں کو جھیل میں تبدیل کردیا اور مختلف مقامات پر مسلسل بارش کے سبب قدیم عمارتوں کو خطرہ لاحق ہوچکا ہے۔ محکمہ موسمیات کی پیش قیاسی میں کہا گیا کہ آئندہ 5یوم بارش جاری رہنے کا امکان ہے اور دونوں شہروں میں بارش سے عام زندگی درہم برہم ہوگئی اور کئی علاقوں میں سڑکوں کی حالت تباہ کن ہوچکی ہے۔ ریاست کے کئی ذخائر آب کی سطح آ ب میں تیزی سے اضافہ ہونے لگا ہے اور محکمہ آ بپاشی کے عہدیداران ذخائر آب کی سطح پر نظر رکھے ہوئے ہیں۔محکمہ موسمیات کی تفصیلات میں کہا گیا کہ ریاست کے کئی اضلاع میں آئندہ 48گھنٹوں میں بھی شدید بارش کا امکان ہے۔ حکومت نے مسلسل بارش کے پیش نظر 20اور21 جولائی کو تعلیمی ادارہ جات کو تعطیل کا اعلان کیا ہے لیکن جواہر لعل نہرو ٹیکنیکل یونیورسٹی نے امتحانات کو ملتوی نہ کرنے کا فیصلہ کرکے امتحانات جاری رکھے ہوئے ہے۔ دونوں شہروں میں مانسون کی تاخیر کے بعد بارش میں کمی کو گذشتہ 3یوم کی بارش نے مکمل کرلیا ہے اور 20جولائی کو مجموعی طور پر شہر میں 122 ملی میٹر بارش ریکارڈ کی گئی جو کہ معمول سے زیادہ بارش ہے۔ محکمہ موسمیات کی پیش قیاسی کے مطابق دونوں شہروں میں آئندہ 48 گھنٹوں میں موسلادھار بارش کا امکان ہے اور مسلسل بارش سے کئی مقامات پر پانی جمع ہونے اور نشیبی علاقوں میں پانی داخل ہونے کی شکایات ملی ہیں۔ شیرلنگم پلی میں ریلوے برج کے نیچے سے گذرنے والی سڑک پر زائد از 3 فیٹ پانی جمع ہو جانے کے سبب راہگیروں کو مشکلات کا سامنا کرنا پڑا جبکہ کئی گاڑیوں کے فیل ہونے کی وجہ سے ای وی ڈی ایم عملہ کو ان گاڑیوں کو نکالنے کی کوشش کرتے دیکھا گیا۔ مجلس بلدیہ عظیم تر حیدرآباد کے علاوہ ضلع انتظامیہ کی جانب سے شہر میں مسلسل بارش کے پیش نظر شہریوں سے اپیل کی گئی کہ وہ بلا ضرورت گھروں سے نکلنے سے اجتناب کریں تاکہ کسی طرح کی مشکلات کا سامنا نہ کرنا پڑے۔تلنگانہ اسٹیٹ سدرن پاور ڈسٹربیوشن کمپنی نے عوام کو برقی کھمبوں اور ٹرانسفارمرس کے قریب سے نہ گذرنے کا مشورہ دیا اور کہا ہے کہ وہ ان سے دور رہیں۔