• 23 Jul, 2023
• admin
• No comment

بار بار قرآن پاک جلانے پر سعودی عرب کو غصہ آگیا، اب کیا کہا؟

سویڈن کے بعد ڈنمارک میں بھی قرآن مجید کو نذر آتش کرنے کے واقعے کے بعد سعودی عرب کی وزارت خارجہ نے ردعمل کا اظہار کیا ہے۔

سعودی عرب کی وزارت خارجہ کے بیان کے مطابق، “سعودی عرب قرآن کو نذر آتش کرنے کے بار بار ہونے والے واقعات کو روکنے کے لیے اقدامات کرنے میں ناکامی کی مذمت کرتا ہے۔ حال ہی میں ڈنمارک میں قرآن کو جلایا گیا اور اسلام اور مسلمانوں کے خلاف نفرت انگیز نعرے لگائے گئے۔ یہ سب کچھ کوپن ہیگن میں عراق کے سفارت خانے کے سامنے ہوا۔ سعودی عرب ان حرکتوں کی شدید مذمت کرتا ہے۔

سعودی عرب نے کہا کہ ایسی کارروائیوں سے مذاہب کے درمیان نفرت اور تشدد میں اضافہ ہوتا ہے۔

وزارت خارجہ نے اپنے بیان میں کہا کہ ایسی اشتعال انگیز کارروائیوں سے دنیا بھر کے کروڑوں مسلمانوں کے جذبات مجروح ہوتے ہیں۔

بیان میں کہا گیا ہے کہ ایسے اقدامات بین الاقوامی قوانین کی خلاف ورزی ہیں۔
ہفتے کے روز، لوگوں کے ایک گروپ نے کوپن ہیگن میں عراقی سفارت خانے کے باہر قرآن کو نذر آتش کیا۔

یہ واقعہ اس وقت پیش آیا ہے جب دو روز قبل سینکڑوں مظاہرین نے عراق میں سویڈن کے سفارت خانے کے باہر حملہ کیا تھا۔

یہ لوگ گزشتہ دنوں سویڈن میں قرآن مجید کو جلائے جانے کے خلاف احتجاج کر رہے تھے۔

جمعرات کو عراقی حکومت نے بغداد سے سویڈن کے سفیر کو واپس جانے کو کہا۔ حال ہی میں سویڈن کے دارالحکومت سٹاک ہوم میں ایک مسجد کے باہر قرآن مجید کو نذر آتش کرنے کا واقعہ پیش آیا۔

عراق نے بھی سویڈن سے اپنے سفارت کار کو واپس بلا لیا ہے اور سویڈش کمپنیوں کے ساتھ کاروبار معطل کر دیا ہے۔

عراق میں مظاہرین بغداد میں سویڈن کے سفارت خانے کے باہر جمع ہو رہے تھے۔ مظاہرین نے سویڈن کے سفارت خانے کے احاطے کو آگ لگا دی۔